Полацк святкуе Дзень горада
Штогод у маі Полацк святкуе свой дзень нараджэння. І заўсёды шырока і доўга. Сёлета ўрачыстасці з нагоды 1148-годдзя горада будуць праходзіць два тыдні – з 18 па 29 мая. Святочная праграма распачалася з блоку пад назвай «Полацк музейны». На працягу чатырох дзён усе 11 музеяў горада будуць працаваць па асаблівым графіку (з 12 да 20 гадзін) і паказваць новыя экспазіцыі, спецыяльна падрыхтаваныя да фэсту. Трэба адзначыць, што ўваход у музеі 18 мая быў бясплатны. 21 мая ў Полацку адчыняць помнік героям Айчыннай вайны 1812 года. Помнік спрэчны, аб яго дагэтуль ламаюць дзіды гісторыкі і неабыякавыя грамадзяне… Аднак гарадскія ўлады плануюць правесці ў гэты дзень пышную ўрачыстасць – з парадам, ваенным аркестрам, гістарычнай рэканструкцыяй падзей вайны 1812 года. У святочнай праграме таксама шмат іншых мерапрыемстваў – спартыўных, тэатральных, музычных. 28 мая ў горадзе адкрыюць бюст яшчэ адному славутаму палачаніну – заснавальніку беларускага кіно Юрыю Тарычу. Галоўны дзень свята, як заўжды, прыпадзе на апошнюю суботу мая, сёлета – на 29-га. Канцэрты, выставы, кірмашы, феерверк – палачане пагуляюць уволю. Таццяна МАЦЬВЕЕВА
|