Коласаўцы адыгралі новы «Квартэт»
Новы сезон Новы тэатральны сезон распачне 5 кастрычніка Нацыянальны акадэмічны драматычны тэатр імя Якуба Коласа. Юбілейны, 85-ты, сезон па традыцыі адкрыецца «Несцеркай». Але ўжо 26 верасня адбылася першая прэм’ера – пастаноўка мастацкага кіраўніка тэатра Рыда Таліпава п’есы Рональда Харвуда «Квартэт». Аўтар твору больш вядомы як сцэнарыст фільма Рамана Паланскі «Піяніст» («Оскар» за лепшы сцэнарый 2003 года). Музычная тэма становіцца лейтматывам і «Квартэту». Чатыры згаслыя оперныя зоркі трапляюць на схіле жыцця ў так званы «дом ветэранаў сцэны» (іншымі словамі – дом састарэлых). «Зрынутыя багі сцэны» Сесіль (Святлана Акружная), Рэджы (Віктар Дашкевіч), Уіл (Рыгор Шацько) і Джын (Тамара Скварцова) знаходзяць у сабе сілы жыць, а не бязвольна згасаць. У юбілейны вечар Вэрдзі яны, як у лепшыя гады, збіраюцца спець (хай сабе і «пад фанеру») квартэт з «Рыгалета». Гэта вяртае іх і на сцэну, і ў жыццё. «Вось гэты выхад на сцэну для іх – скачок у свет мастацтва, у боскую музыку. Вось аб гэтым, напэўна, я й раблю спектакль – пра тое, што ў кожным узросце можна знайсці справу, якая чапляе на жыццё… якое з намі сёння, заўтра, пастаянна. І героі знайшлі справу – таму яны будуць жыць…» – гэтак трактуе п’есу рэжысёр спектакля Рыд Таліпаў. У гэтай «кранальнай гісторыі» (так пазначаны жанр) высокае пераплятаецца з нізкім, развагі аб мастацтве суседзяць з жартамі ніжэй пояса, а ўспаміны – з рэальнасцю. А на іх скрыжаванні – гучыць музыка (сапраўды – боская), якая, цытуем аднаго з герояў, «не мае сэнсу, калі не выводзіць з адчаю». Ратаваць ад адчаю – мэта самой пастаноўкі. Мяркуем, яна тае мэты дасягнула. Але і паставіла цвярозае пытанне: «Цікава: што мы будзем рабіць, калі ўсё гэта скончыцца?..» (Уіл). На перадпрэм’ернай прэс-канферэнцыі Рыд Таліпаў прызнаўся, што «Квартэт» не з’яўляецца п’есай, пастаўленай «пад юбілей». Ролю юбілейнай пастаноўкі выканае іншы спектакль: «Як тыя героі «Квартэту», я таксама хачу зрабіць скачок. Ён – углыб п’есы Кандрата Крапівы «Брама неўміручасці». Мне гэта вельмі важна, таму што гэта п’еса аб тым, ці маем мы сёння права на неўміручасць… Гэта будзе юбілейным спектаклем. Але я ніводны спектакль не раблю як дзяжурны…» – запэўніў журналістаў мастацкі кіраўнік тэатра. Новы сезон абяцае шмат цікавосткаў. Акрамя «Брамы неўміручасці», якую плануюць паказаць у снежні, гледачы пабачаць сёлета «Вельмі простую гісторыю» Марыі Ладо ў пастаноўцы Юрыя Лізянгевіча, адноўленую «Ладдзю роспачы» Уладзіміра Караткевіча (пастаноўка Міхася Краснабаева) і «Шлях на Батлеем» – Таццяны Сядовай па п’есе Сяргея Кавалёва. У 2011 годзе на коласаўскай сцэне дадуць таксама шэкспіраўскую «Рамэо і Джульету» (рэжысёр – Валерый Беляковіч), «Шышка» Аляксандравай (Ігар Баярынцаў), «Перабор» Херберта Бергера (Міхась Краснабаеў), спектаклі «Ханума» Цагарэлі (Галіна Галкоўская), «Прывабная жанчына з кветкай і вокнамі на поўнач» Эдварда Радзінскага (Юрый Лізянгевіч), «З любімымі не раставайцеся» Аляксандра Валодзіна (Рыд Таліпаў). Сачыце за тэатральнай афішай «ВП». Нагадаем, што 5 кастрычніка, на адкрыцці 85-га тэатральнага сезону (19.00) – адбудзецца ўручэнне «мясцовых Оскараў» – прызоў і дыпломаў творчага конкурсу маладых артыстаў, а таксама – артыстам старэйшага пакалення: імя народнага артыста СССР А. Ільінскага «За шматгадовае самаадданае служэнне Коласаўскаму тэатру» і імя народнай артысткі БССР Алены Радзялоўскай «За прафесійны гонар, інтэлігентнасць, самаадданае служэнне Коласаўскаму тэатру». Прозвішчы пакуль не называем… Зьміцер КАЗАКЕВІЧ, «ВП». Фота Вікторыі ДАШКЕВІЧ
|