Да юбілею Броўкі
Сёлета Беларусь адзначыць 105-гадовы юбілей нашага земляка, Народнага паэта БССР Петруся Броўкі. Ён нарадзіўся на Ушаччыне 25 чэрвеня 1905 года. Віцебская гарадская бібліятэка імя П. Броўкі пачала на мінулым тыдні месячнік, прысвечаны жыццю і творчасці пісьменніка. У першым мерапрыемстве бралі ўдзел навучэнцы гімназіі №5 Віцебска, літаратары, бібліятэкары, група хору пад кіраўніцтвам Віталія Раўзы. Пра творчасць Броўкі распавяла паэтка Вольга Русілка, вершы са сваёй апошняй кнігі «Зрэшты» чытаў пісьменнік Уладзімір Папковіч, а паэт Давід Сімановіч дзяліўся ўспамінамі – цытаваў старонкі сваёй кнігі «Витебский вокзал, или Вечерние прогулки через годы», звязаныя з Петрусём Броўкам. Справа ў тым, што за тры тыдні да свайго 70-годдзя (1975 год) Пятрусь Броўка наведаў Віцебск і перадаў праз Давіда Сімановіча зварот да віцяблян з нагоды свайго юбілею. Гэты ліст Давід Сімановіч падарыў падчас імпрэзы бібліятэцы. «Заўсёды радуюся поспехам маіх дарагіх землякоў – віцяблян. Жадаю, каб з кожным днём вашы дасягненні раслі і памнажаліся. Шчыра ўдзячны і за вялікую ўвагу да маёй творчасці, а гэта дае добры настрой для працы наперадзе. П. Броўка. Чэрвень 1975 г.». Зьміцер КАЗАКЕВІЧ, «ВП»
|