Махнём на «Фэст на Дзядку»!
Анонс Недалёка ад Глыбокага паміж Пятровым і Успенскім пастамі штогод праводзіцца «Фэст на Дзядку», на які збіраюцца глыбачане, жыхары суседніх раёнаў і турысты. Сёлета фэст адбудзецца 18 ліпеня. Як паведаміла адна з арганізатараў фэста Алена Арэхава, старшыня СВК «Пятроўшчына», кожны год у фэста свая тэматыка. У гэтым годзе ён прысвячаецца дынастыям. А кожны з гасцей абавязкова знойдзе тут занятак для сябе. Будуць выступаць фальклорныя гурты, клубы гістарычнай рэканструкцыі, прамаўляць паэты і краязнаўцы, адбудуцца тэатралізаванае прадстаўленне, конна-спартыўныя спаборніцтвы, старадаўнія забавы, майстры пакажуць свае вырабы. Зразумела, не абыдзецца без шашлыкоў і смажаных каўбасак. «Фэст на Дзядку» карыстаецца асаблівай папулярнасцю ў сельскіх жыхароў, бо тут можна купіць карову ці цяля, каня ці жарабяці, курэй ці куранят, парасят і дровы на зіму. Да таго ж месца, дзе праходзіць свята, зачароўвае сваёй прыгажосцю, тут ёсць і свой дэндрапарк. Как дабрацца на «Фэст на Дзядку», трэба ехаць ад Глыбокага ў бок Шаркаўшчыны да вёскі Пятроўшчына, там звярнуць на Бабічы і – вы амаль на месцы. – Пачнуцца святочныя мерапрыемствы апоўдні – каб усе госці паспелі, – дадала Алена Арэхава. Алена АЛІМАВА, «ВП»
|
