Паляшуцкія іконы
Галерэя Адзін з мастацкіх праектаў «Славянскага базару» можна пабачыць ужо зараз, наведаўшы абласны краязнаўчы музей. Гэта выстава беларускіх народных абразоў з фондаў Беларускага дзяржаўнага музея народнай архітэктуры і побыту, што знаходзіцца пад Мінскам. У экспазіцыі – 36 абразоў XIX – пачатку XX ст.ст., сабраных у вёсках і хутарах Палесся і Падняпроўя падчас навуковых экспедыцый 1977-1995 гг. Абразы пісалі вясковыя мастакі-самавучкі. Часцей за ўсё імі ўпрыгожвалі сялянскія хаты, зрэдку – вясковыя храмы. Народныя іконы, хоць і ствараліся згодна з праваслаўнымі традыцыямі, усё ж моцна адрозніваюцца ад кананічных. Напісаныя яркімі, сакавітымі колерамі, яны больш дэмакратычныя ў сюжэтах і выкананні. Малюнак рабіўся фарбамі проста па дошцы, без папярэдняй грунтоўкі. Любімым прыёмам дэкору ў «багамазаў», як называлі такіх самабытных мастакоў, быў раслінны арнамент. Часцей за усё – кветкі. Народныя іканапісцы не валодалі акадэмічным малюнкам, іхні пэндзаль наіўны і непасрэдны, аднак гэтыя абразы вельмі саграваюць. Божая Маці і святыя глядзяць з іх так спакойна і ласкава, што здаецца: са сваёй недаступнай вышыні яны бачаць і разумеюць усе нашыя мірскія справы і клопаты. І робяць так, каб усім нам хапіла шчасця, надзеі, дабрыні… Урачыстае адкрыццё выставы адбудзецца 11 ліпеня. Дадамо, што абразы з паляшуцкіх вёсак будуць эскпанавацца ў Віцебску досыць доўга – да канца верасня. Таццяна МАЦЬВЕЕВА. Фота Вікторыі ДАШКЕВІЧ, «ВП»
|
