'Лялька' адкрыла сезон
Перад спектаклем «Жыў-быў Заяц», які паказалі лялечнікі ў гэты дзень, хлопчыкі і дзяўчынкі танцавалі, гулялі, адказвалі на пытанні казачных герояў, атрымлівалі прызы і падарункі. А ўвечары зала «Лялькі» сабрала дарослых гледачоў. Іх увазе быў прапанаваны прэм’ерны спектакль «Дэкамерон», а пасля яго – раскрылася галоўная інтрыга мінулага сезону. Стала ўжо добрай традыцыяй напярэдадні новага сезону ўзнагароджваць дыпломамі і памятнымі падарункамі лепшых артыстаў сезону мінулага. Вызначаюцца пераможцы шляхам тайнага галасавання творчай часткі калектыву. Вось толькі намінацыя «Лепшы эпізод» сёлета «ператварылася» ў «Лепшы дэбют». Бо дэбютантаў сярод лялечнікаў шмат – двое маладых артыстаў уліліся ў трупу яшчэ ў мінулым сезоне, а яшчэ для двух – Сяргея Талкача і Марыны Нікіцінай – юбілейны сезон «Лялькі» стане першым. Лепшым сярод дэбютантаў названы Валеры Зімніцкі за ролю Джавані, уладальнікам прыза за «Лепшую мужчынскую ролю» стаў Алесь Маханькоў (роля Аўтара), а выканаўцай «Лепшай жаночай ролі» (ролі Нінэты) стала Вольга Маханькова. Усе «зорныя» вобразы сышліся ў спектаклі «Дэкамерон», які, як абяцае мастацкі кіраўнік Віктар Клімчук, будзе рэгулярна ісці ў новым сезоне. Вікторыя ДАШКЕВІЧ, «ВП»
|