Віцебск стварае свой гімн
Наш горад Вiцебскі гарвыканкам абвясціў конкурс на стварэнне тэксту i музыкi гімна горада «Конкурс на стварэнне тэксту i музыкi гімна горада праводзiцца ў мэтах дэмакратычнага адбору мастацкiх твораў, якiя адпавядаюць статусу горада Віцебска як самастойнай адміністрацыйна-тэрытарыяльнай адзінкі Віцебскай вобласці, якая мае сваю індывідуальнасць і гісторыка-культурную каштоўнасць», – тлумачыцца на сайце гарвыканкама. Як сцвярджаюць арганізатары конкурсу, ён будзе адкрытым і добраахвотным. Удзел у ім могуць узяць не толькі пэўныя асобы, але і творчыя калектывы. «Тэкст на беларускай мове i музыка гімна павiнны мець высокі мастацкі ўзровень, iнтанацыйна-меладычную яснасць, патрыятычнасць, запамiнальнасць, урачыстасць і рытм шэсця, адлюстроўваць індывідуальнасць і гісторыка-культурную адметнасць Віцебска ў кантэксце развіцця Рэспублікі Беларусь», – гэта патрабаванні да літаратурных і музычных твораў удзельнікаў. Варыянты гімну будзе разглядаць адмысловая камісія па правядзенню конкурсу на стварэнне тэксту i музыкi гімна горада Віцебска, склад якой будзе прызначацца распараджэннем старшыні Віцебскага гарадскога выканаўчага камітэта. Рашэнне – па вынiках абмеркаванняў і на падставе большасцi галасоў – будзе выносіцца шляхам тайнага галасавання. Камiсiя вызначае адзін лепшы твор адпаведна тэксту i музыкі. Калi ў прадстаўленым творы аднаго аўтара (аўтараў) тэкст або музыка будуць прызнаны лепшымi, камiсiя мае права вылучыць яго асобна. Вынікі падвядуць да 29 кастрычніка 2010 года. Даніла ДОЛЬНІК, «ВП»
|
